Mga ospital na inireklamong tumanggi sa pasyente, iniimbestigahan na

Arra Perez, ABS-CBN News

Posted at Jun 13 2020 08:34 PM

MAYNILA--Papatawan ng karampatang aksiyon ang mga ospital na mapatutunayang may paglabag matapos silang ireklamong tumanggi sa mga pasyente. 

Sa Laging Handa Public briefing nitong Sabado, sinabi ni Health Undersecretary Maria Rosario Vergeire na iniimbestigahan na ang naturang mga insidente, saka nagpaalala sa mga ospital, pribado man o pampubliko, na hindi sila pwedeng tumanggi ng pasyente.

"Sakaling hindi kaya ng ospital o walang capacity for the specific condition, kailangan muna i-stabilize ang pasyente, asikasuhin at i-refer. Kung ire-refer outside of their hospital to another hospital, they should be the ones to coordinate that," aniya. 

Nagbabala rin si Vergeire sa mga gumagamit at nagbebenta ng rapid antibody test kits. Aniya, dapat registered ito sa Food and Drug Administration (FDA) at masigurong accurate ang resultang lalabas.

"Kailangan may validation ng RITM [Research Institute for Tropical Medicine] itong mga rapid anti-body test kits. Ang RITM ang makakapagbigay ng rekomendasyon kung ano-anong rapid anti-body tests sa market ang highly sensitive at highly specific that will provide accurate results," aniya.

Nitong mga nakaraang linggo, may mga naarestong online sellers ng unregistered rapid test kits. 

Bisitahin ang Patrol.PH para sa iba pang mga balita.