Inaresto ang isang Chinese national sa Santa Ana, Cagayan nitong Miyerkoles ng umaga dahil umano sa pagtutulak ng shabu.

Ayon sa Philippine Drug Enforcement Agency Region 2, ikinasa nila ang buy-bust operation sa 38-anyos na negosyanteng si Lijun "Kevin" Cao matapos na makatanggap ng impormasyon tungkol sa ilegal nitong gawain.

Nakumpiska umano sa suspek ang 34 na piraso ng heat-sealed plastic sachet na naglalaman ng hinihinalang shabu, kabilang na dito ang kaniyang ibinenta sa PDEA agent na nagpanggap bilang poseur buyer.

Sa pagtaya ng PDEA Region 2, umaabot ng humigit-kumulang 5 gramo ang kabuuang timbang ng nakumpiskang mga shabu na may katumbas na halagang P34,000.

Kinuha rin ng awtoridad bilang ebidensya ang mga cellphone at sasakyan ng suspek.

Nasampahan na si Lijun ng reklamong paglabag sa Section 5 at 11, Article 2 ng Republic Act 9165 o Comprehensive Dangerous Drugs Act.

—Ulat ni Harris Julio

KAUGNAY NA BALITA

Watch more in iWantv or TFC.tv