MANILA — Nagpositibo sa rapid antibody test para sa new coronavirus ang 12 kawani ng Manila City Hall, kinumpirma ng lokal na pamahalaan Huwebes, ika-4 na araw ng pinaluwag na pandemic lockdown sa Metro Manila.

Kabilang ang 12 sa 743 empleyado ng pamahalaang lungsod na dumaan sa naturang screening mula noong Lunes, ayon sa Manila Public Information Office.

Agad na isinalang sa confirmatory swab testing ang 4 sa 12 kawani, habang hinihintay pang makuhanan ng sample ang 8 sa kanila.

Nasa 436 pasyente na ang gumaling mula sa COVID-19 sa Maynila habang 960 ang aktibong kaso ng naturang respiratory disease doon, ayon sa Hunyo 3 na datos ng city government.

Nasa 1,414 ang itinuturing na mga suspected cases at 60 ang probable cases habang nasa 104 ang mga nasawing pasyente dahil sa coronavirus.