Nakuhanan ng iba't ibang uri ng armas ang ina at kapatid ni Claveria Mayor Meraluna Salvaleon sa Barangay Malagana, sa kaniyang bayan sa Misamis Oriental Martes ng madaling araw.

Sa bisa ng search warrant, ni-raid ng Criminal Investigation and Detection Group Region 10 ang bahay ni Gertrudes at Reggan Salvaleon, ang ina at kapatid ng alkalde.

Nakompiska ang isang kalibre-.45 baril, KG-9 submachine gun, at mga bala mula sa 2 lalaking nagsisilbing guwardiya ng pamilya.

Depensa ng alkalde, nagsisilbing guwardiya sa pamilya ang 2 lalaking tauhan ng kaniyang ina. Nakatanggap umano ang pamilya ng banta sa kanilang buhay dahil sa alitan sa lupa.

Ayon kay CIDG 10 officer-in-charge Lt.-Col. Raymund Liguden, nakatanggap sila ng impormasyon na may mga armas ang pamilya.

"Wala naman silang security-guard license na hawak para magsilbi na private security guard sa kanila. So this confirms now na 'yung una naming report na merong armed group elements doon sa lugar," paliwanag ni Liguden.

Nahaharap sa kasong paglabag sa Republic Act 10591 o Comprehensive Law on Firearms and Ammunition at Omnibus Election Code dahil sa gun ban ang mag-inang Salvaleon at ang 2 guwardiya nila.