CEBU CITY - Patay ang isang bagong laya matapos pagbabarilin ng riding-in-tandem sa Barangay Lawaan Uno, Talisay City, Cebu Lunes ng hapon.

Kinilala ang biktima na si Jovek Abellana na nagtamo ng mga tama ng bala sa ulo at katawan.

Kuwento ng ilang residente sa lugar, kalalabas lang ng biktima sa isang kainan nang biglang pagbabarilin ng mga hindi pa kilalang salarin.

Kabilang sa tinitingnang motibo sa pamamaril ng Talisay City police ang anggulong may kaugnayan sa ilegal na droga.

Kalalaya lang nitong Marso ni Abellana sa kasong possession of illegal drugs at illegal possession of firearms. - Ulat ni Aiza Layague, ABS-CBN News