Ilang lugar sa Davao City, binaha

Benie Boy Angchay, ABS-CBN News

Posted at May 25 2019 12:00 PM

DAVAO CITY – Binaha ang ilang lugar sa lungsod matapos bumuhos ang malakas na ulan dahil sa localized thunderstorms, Biyernes ng gabi.

Agad na nag-monitor ang mga kawani ng Barangay Disaster Risk Reduction and Management Council sa Balusong river sa Barangay Matina Crossing para maabisuhan agad ang mga residente kung kailangan na nilang lumikas.

Marami ang na-stranded sa KM.6 dahil nag-overflow ang tubig baha sa tulay na pansamantalang dinadaanan ng mga sasakyan.

Ang ilang motorista at residente, sumulong na lang sa tubig baha para makauwi sa kanilang bahay.

Taong 2011 nang 30 ang namatay sa nangyaring flashflood sa Matina Pangi.

Sa Quirino corner Jacinto Street naman, binaha rin ang kalsada kaya nahirapan makadaan ang mga sasakyan.

Namatayan din ng makina ang ilang tricycle sa Marfori Heights at pinasok ng tubig baha ang ilang tindahan.

Nangako na ang mga konsehal sa Davao at si Vice Mayor- elect Sebastian Duterte na tututukan ang problema sa drainage sa lungsod para maiwasan na ang pagbaha.

Bisitahin ang Patrol.PH para sa iba pang mga balita.