MAYNILA - Nasabat ng pinagsanib na puwersa ng Philippine Coast Guard, Philippine National Police-Maritime Group at Bureau of Fisheries and Aquatic Resources ang kahon-kahong mga isda at iba pang lamang dagat mula sa dalawang cargo vessel sa Delpan Wharf sa Parola Compound sa Tondo Huwebes.

Ayon kay Lieutenant Mizar Cumbe, hepe ng Coast Guard Delpan, pinigil nila ang mga nasabing kargamento na nasa 128 cooler box mula sa mga barko nang ito ay dumaong sa nasabing pantalan matapos maglayag mula sa Corregidor Island.

Nauna dito, sakay ng Multi Mission Off Shore Vessel at BRP Lapu-Lapu ang pwersa ng Coast Guard, PNP at BFAR at nagsagawa ng pag-sample ng mga isdang hinihinalang nahuli sa ilegal na pamamaraan sa Corregidor.

Nang magpositibo ang unang sinuring kahon ay sinundan na ng awtoridad ang MB Jemma at MV Princess Christine hanggang makadaong sa Delpan Wharf.

Ipinaubaya na ng Coast Guard sa BFAR ang pagsasagawa ng eksaminasyon sa kahon-kahong isda kung nahuli lahat ito sa pamamagitan ng pagdidinamita.

Ang BFAR na rin ang siyang magsasampa ng kaukulang kaso sa mga responsable.

Nabatid na inarkila lang ang dalawang barko para ibiyahe ang mga nahuling isda.