'LTO fixer' arestado sa Quezon City

ABS-CBN News

Posted at May 23 2019 02:26 PM

Naaresto ng pulisya noong Miyerkoles ang isang babaeng "fixer" ng mga transaksiyon sa Land Transportation Office (LTO).

Kinilala ni National Capital Region Police Office (NCRPO) director Police Maj. Gen. Guillermo Eleazar ang suspek bilang si Lita Galera, 43.

Sa bisa ng warrant of arrest para sa kasong estafa, hinuli ng NCRPO Regional Special Operations Unit (RSOU) si Galera sa Barangay Pinyahan bandang 4:15 ng hapon, ayon sa ulat ng pulisya.

Nag-ugat ang operasyon sa reklamo ni alyas "Ina," na lumapit umano kay Galera noong Setyembre 2009 para sa mabilisang pagproseso ng mga prangkisa ng mga taxi nito.

Nagbayad si "Ina" ng napagkasunduang halaga pero hindi raw naibigay ng suspek ang mga prangkisa at tinangay ang pera, ayon sa pulisya.

Mananatili sa kustodiya ng NCRPO-RSOU ang suspek habang naghihintay ng utos mula sa korteng naglabas ng warrant laban sa kaniya, ayon sa pulisya. --Ulat ni Jaehwa Bernardo, ABS-CBN News

Bisitahin ang Patrol.PH para sa iba pang mga balita.