SAPUL SA CCTV: Kawatan, ninakaw ang motor sa loob ng isang minuto

Doland Castro, ABS-CBN News

Posted at May 24 2017 02:17 AM

Natangay ng isang magnanakaw sa loob ng isang minuto ang isang motorsiklong nakaparada sa Timog Avenue, Quezon City nitong Martes.

Sa kuha ng CCTV, makikitang magka-angkas ang dalawang lalaking sakay ng isang motorsiklo sa Tomas Morato, Quezon City.

Ilang minuto pa, huminto sila sa lugar na ito sa Timog Avenue. Bumaba ang isang lalaki at agad nagtungo sa hilera ng mga nakaparadang motorsiklo.

Wala pang isang minuto ang nakalilipas, natangay na ang motorsiklo ng biktima na ayaw magpakilala.

Masama ang loob ng biktima lalo’t hinuhulugan pa niya ang ipinundar na motor.

"Nagulat po dahil may kandado po iyon eh, sana po mahuli sila at marekober pa ang motor ko kung kaya,” aniya.

Pinag-aaralan na ng Quezon City Police District (QCPD) kung iisang grupo lamang ang tumatangay ng mga motor sa lungsod.

Kamakailan lamang ay may natangay din na motorsiklo sa Barangay Central, Quezon City.

Bisitahin ang Patrol.PH para sa iba pang mga balita.