Mensahe ni Lito Lapid sa mga bumabatikos: 'Salamat na lang'

Justin Aguilar, ABS-CBN News

Posted at May 16 2019 07:05 PM

Hindi umano inaasahan ni Lito Lapid ang takbo ng resulta ng halalan kung saan nasa ika-7 ranggo siya sa Magic 12. Larawan mula kay Leo Mercado

BAGUIO CITY – Nagpaabot ng pasasalamat si Lito Lapid hindi lamang sa mga sumuporta sa kaniyang kandidatura, maging sa mga bumabatikos sa kaniyang pagkapanalo bilang senador, base sa partial and unofficial results. 

“Nababalitaan ko lang. Bahala na sila doon. Salamat na lang. At least napapansin niyo ako masama man o mabuti," sabi ni Lapid na nagbabakasyon sa Baguio kasama ang asawa.

Hiling din niya sa publiko na huwag maliitin ang kaniyang kakayahan bilang isang pulitiko. Naging senador si Lapid ng dalawang termino noong 2004 at 2016. May karanasan din siya sa paglilingkod sa lokal na pamahalaan bilang gobernador ng Pampanga.

Ayon kay Lapid ng partido NPC, hindi niya inaasahan ang kasalukuyang takbo ng resulta ng eleksyon kung saan nananatili siyang nasa pang 7 ranggo sa canvassing para sa pagka-Senador.

“Ipagpapatuloy po natin yung naisumite nating batas," ani Lapid.

May mga nakahanda na rin daw siyang panukalang batas na isusulong.

"Yung free legal assistance, ito naman, free medical naman," ani Lapid.

Bisitahin ang Patrol.PH para sa iba pang mga balita.