Watch more in iWantv or TFC.tv

Tumawid sa serbisyo publiko ang ilan sa mga personalidad sa show business matapos magwagi sa nakalipas na barangay elections.

Kabilang sa mga artistang nanalo ay ang aktres na si Angelika dela Cruz, na reelcted barangay captain ng Longos, Labaon.

Inalay ni Dela Cruz ang pagkapanalo sa yumaong kapatid na naging inspirasyon umano niya sa pagpasok sa politika.

"Si Edward talaga 'yong kapatid ko ang talagang gustong-gusto niyang mag-public service... bago siya makaupo, na-hit-and-run siya," sabi ni Dela Cruz.

Hinirang din bilang barangay captain sa Kaunlaran, Navotas si Toto Natividad, na naging direktor ng teleseryeng "FPJ's Ang Probinsyano."

Nalusutan din ng dancer na si Lea Carlos Santos, o mas kilala bilang Luningning, at dating aktres na si Tina Monasterio ang halalan sa Quezon City.

Ipinroklamang kagawad si Luningning sa Barangay Paligsahan habang kagawad naman sa Barangay Duyan-Duyan si Monasterio.

Naungusan naman ng manugang ni Alma Moreno na si Jenny Salimao-Quizon, misis ni Vandolph Quizon, ang mga katunggali bilang kapitan ng Barangay Tambo, Parañaque.

"Primary pangangailan ng mga tao sa medicine, lahat, sana naman naibibigay. Tapos sa trabaho, livelihood," ani Jenny.

Limandaang boto ang lamang ni Quizon sa mga kalaban.

Pamumunuan niya ang barangay na sumasakop sa mga hotel at casino sa lungsod.

• Ilang sikat, tumakbo sa barangay elections

-- Ulat ni Mario Dumaual, ABS-CBN News