Kotse, nadaganan ng puno sa Iligan City dahil sa lakas ng hangin

ABS-CBN News

Posted at May 07 2021 09:34 PM

Larawan mula kay Jack Tugot.

ILIGAN CITY - Isang kotse ang nadaganan ng puno sa Beltran Road sa barangay Del Carmen sa Iligan City nitong Biyernes ng hapon dahil umano sa lakas ng hangin. 

Wala namang nasaktan sa insidente.

Ayon kay Teofe Verdida, binabaybay niya ang Beltran Road alas-4 ng hapon habang malakas ang ulan at hangin, nang biglang natumba ang puno ng niyog na nasa gilid ng kalsada. 

Tumama raw ang puno sa hood ng minamaneho na kotse ni Verdida. Hindi naman tinamaan ang sakay nito.

Dahil nakahambalang ang puno, kinailangang bumalik sa rota ang mga sasakyan. 

Natumba rin ang mga puno sa gilid ng Emie Road sa Marawi City dahil pa rin sa malakas na ulan at hangin. 

Agad na nagsagawa ng clearing operations sa lugar lalo't ito ang pangunahing daan papuntang Iligan.

- Ulat ni Roxanne Arevalo
 

Bisitahin ang Patrol.PH para sa iba pang mga balita.