PatrolPH

10 tagasuporta ni Jonvic Remulla kinasuhan ng 'vote-buying'

ABS-CBN News

Posted at May 06 2019 04:11 PM | Updated as of May 06 2019 08:06 PM

Watch more on iWantTFC

(UPDATE) Kinasuhan ngayong Lunes ang 10 tagasuporta ng tumatakbong gobernador ng Cavite na si Jonvic Remulla dahil sa umano ay pamimili ng boto. 

Kasong paglabag sa Omnibus Election Code ang isinampa sa mga tagasuporta, na naaresto noong Sabado sa operasyong ikinasa ng pulisya sa Barangay Zapote V, Bacoor City.

Nagsagawa ng operasyon ang pulisya matapos makatanggap ng impormasyong may nangyayaring "vote-buying" o pamimili ng boto sa nasabing barangay. 

Nakuha sa mga suspek ang mga brown envelope na may lamang tig-P200.

Nakumpiska rin ang higit P83,000, mga plastic bag ng baller, at notebook na may mga nakalistang pangalan.

May nakuha ring campaign T-shirts na may nakasulat na pangalan ni Remulla at kapartidong si Jolo Revilla, na muling tumatakbo sa pagkabise gobernador.

Inamin ni Remulla na mga tauhan niya ang mga naaresto pero hindi umano sila namimili ng boto.

"Allowance 'yon para sa watchers' traning namin," ani Remulla.

"Walang sampling ballot, walang sinasabing iboto, ang sinasabi lang pumunta sa lugar na ito for watchers' training," dagdag niya.

Ipinauubaya muna ng Commission on Elections sa Cavite police ang imbestigasyon sa mga naaresto.--Ulat ni Dennis Datu, ABS-CBN News

Bisitahin ang Patrol.PH para sa iba pang mga balita.