QR code system sa Boracay iminungkahi para makontrol ang dami ng turista

MAYNILA — Matapos dagsain ng mga turista ang Boracay Island noong Holy Week, iminumungkahi ng Department of Environment and Natural Resources (DENR) ang pagpapatupad ng QR code system.

Inirekomenda ng Boracay Inter-Agency Rehabilitation and Management Group (BIARMG) na gamitin ang QR code sa contact tracing para matukoy ang dami ng mga turistang papasok sa isla.

Ayon kay BIARMG General Manager Martin Jose Despi, maiiwasan nitong maulit ang nangyaring overcrowding sa Boracay particular noong nakaraang Holy Week.

Pumalo sa 21,000 hanggang higit 22,000 na turista ang bumisita sa pamosong pasyalan noong April 14 at 15, Maundy Thursday at Good Friday.

Base sa pag-aaral ng DENR, 19,215 turista lang ang carrying capacity ng Boracay kada araw.

• 'Maling-mali': DOT says Boracay went beyond cap for tourists during Holy Week

Para sa DENR, mahalagang nasusunod ang carrying capacity ng isla para maprotektahan at mapangalagaan ang kalikasan.

Maaari kasing maapektuhan ang resources ng isla kung sobra-sobra ang populasyon dito.

Sa pagpapatupad ng QR code system, iminungkahi ng BIARMG na suriin ang bilang ng mga pasahero ng shipping at airlines pati ng hotels para maiwasan ang overbooking.

Sinabi naman ni Environment Undersecretary Jonas Leones na pag-aaralan ng ahensya kung posible pang madagdagan ang carrying capacity ng isla.

Nauna nang iginiit ni Tourism Secretary Bernadette Romulo-Puyat na kailangang sundin ang mga eksperto sa itinakdang carrying capacity ng Boracay.

• Tourism dep't nanindigang kailangang sundin ang Boracay carrying capacity