MANILA – Nakahanda na ang aabot sa 143,000 na pulis na itatalaga sa buong bansa upang matiyak ang kapayapaan sa araw ng halalan, ayon sa tagapagsalita ng Philippine National Police (PNP) na si Col. Bernard Banac.

"Handang handa na ang Philippine National Police," paniniguro ni Banac sa mga dumalo sa isinagawang "Handa Na Ba Kayo" forum ng DZMM TeleRadyo.

Aniya, umabot na sa 4,600 ang mga naaresto dahil sa paglabag sa ipinapatupad na gun ban.

"Naghahain tayo ng search warrants sa mga individual [at] elected officials na nagtatago ng mga kontrabando," dagdag niya. "Lahat ng suspected private armed groups, patuloy nating minamanmanan."

Nagbigay rin siya ng babala sa mga sangkot sa panunuhol habang papalapit ang eleksiyon sa Mayo 13.

"Iwasan ang suhol. Kapag ikaw ay nahuli na nanunuhol o tumatanggap ng suhol, magpapaliwanag ka po sa presinto, dadalhin ka sa presinto ng mga pulis," ani Banac.

Hinihikayat niya rin ang publiko na ipagbigay-alam sa pulis ang anumang mga kahina-hinalang indibidwal upang mabilis na makapagbigay ng responde.--Ulat ni James Amante, ABS-CBN News