2 rape suspek, patay sa enkwentro sa pulis sa Liloan, Cebu. Sugatan ang isang pulis. 📷PNP AKG pic.twitter.com/49IhP6uM6n

— Jekki Pascual (@jekkipascual) April 23, 2021

Patay ang dalawang suspek na may kasong rape matapos makipagbarilan umano sa mga pulis na naghahain ng kanilang arrest warrant sa Liloan, Cebu, Biyernes.

Ayon kay Police Maj. Ronaldo Lumactod Jr, tagapagsalita ng Philippine National Police Anti-Kidnapping Group, nagkasa ng intelligence operations ang mga tauhan ng AKG, Maritime Group operatives at pulis mula sa Iligan at Liloan.

Target nila ang apat na suspek na mag-aamang may arrest warrant sa kasong rape.

Lumapit ang isang pulis sa suspek na si Arnel Capangpangan at sinabing aarestuhin siya pero bigla umanong binaril ng suspek ang pulis, na siyang tinamaan sa tiyan.

• Rape suspect na nagtago nang halos 15 taon huli sa Bacolod

Nagpaputok ang ibang pulis at nakipagbarilan na rin umano ang isa pang suspek na si Marlou Capangpanagan.

Napatay ang dalawang suspek, habang nakatakas naman ang dalawang iba pang kasamahan nila.

Kinasuhan ng rape ang apat na mag-aama noong 2018 matapos umano nila gahasain ang apat na taong gulang na anak ng kanilang kapitbahay sa Iligan City.

Matapos ang krimen, nagtago sila sa Liloan kung saan natunton sila ng intelligence officers.

Nagpapagaling naman sa ospital ang nabaril na pulis na si Lt. Zosimo Ravanes Jr.

Patuloy ang manhunt operation sa dalawang iba pang suspek na nakatakas.