LAOAG CITY - Arestado ang 57-anyos na negosyanteng si Silver Agudong sa pamamaril sa kanyang 25-anyos na kasintahan noong Biyernes sa Laoag City, Ilocos Norte.

Sa imbestigasyon ng mga pulis, habang nakikipag-inuman ang magkasintahan at mga kasamahan nito sa labas ng boarding house ng biktima, nag-selos ang suspek at binaril si Laylen Ramiro.

"Nag-away sila at nang pumasok sa loob ng boarding house, dito na binaril ang biktima," ayon kay police Chief Inspector Bernardo Cerezo.

Isang tama sa tiyan ang tinamo ng biktima na nagpapagaling na sa ospital.

"Nang nagresponde kami, nakuha namin sa suspek ang caliber .45 na ginamit niya sa pamamaril na may 10 bala," dagdag ni Cerezo.

Tumanggi naman na magbigay ng reaksyon ang negosyante sa pangyayari.

Humaharap ito sa kasong paglabag sa frustrated murder at Republic Act 10591 o New Firearms Law.