Sinagot ni Sen. Juan Miguel Zubiri ang kumakalat na video sa social media na kuha mula sa ginanap na campaign rally ni presidential candidate Ferdinand "Bongbong" Marcos Jr. sa Malaybalay City, Bukidnon nitong Huwebes.

Sa kumakalat na video, makikita na nagsasalita sa mikropono si Marcos nang lapitan siya ni Bukidnon Gov. Jose Maria Zubiri at tinangkang kunin ni Zubiri ang kanang kamay ni Marcos para itaas ito.

• Juan Miguel Zubiri eyes reelection, files COC for senator

Pero tila umiwas si Marcos.

Sa official Facebook page ni Sen. Zubiri, ipinaliwanag nito na "miscommunication" lamang ang nangyari sa pagitan ni Marcos at ng kanyang ama.

Sabi ng senador, dapat pagkatapos magsalita ni Marcos ay iwawagayway nito ang bandila ng Pilipinas saka itataas ang kamay ng mga lokal na partido na sumusuporta sa UniTeam.

Dagdag ni Senator Zubiri, sadyang pinutol ang ibang bahagi ng video para hindi makita ang pagtaas ng kamay ng mga lokal na kandidato kasama si Marcos.

• 'Paninira, bulok na taktika': Imee Marcos questions timing of estate tax issue revival

Giit din ng senador na mas dapat pagtuonan ng pansin ang dami ng mga tao na dumalo sa rally imbes na gawing isyu ang pinagkakalat na video.

Ang partido ng mga Zubiri na Bukidnon Paglaum Party ang sponsor sa campaign rally ni Marcos sa probisya.

Maliban sa kanilang grupo, sinusuportahan din ng kabilang partido na pinangunguhanan ni Bukidnon 4th district congressman Oneil Roque ang pagtakbo ni Marcos.

Si Roque ang hahamon kay 3rd district representative Manuel Zubiri sa pagtakbo pagka-gobernador.