Watch more in iWantv or TFC.tv

Arestado ang isang babae matapos mahuling nagbebenta ng mga gamot na umano'y pampalaglag ng bata sa Quiapo nitong Sabado.

Ayon kay Police Chief Insp. Leandro Gutierrez, hepe ng Plaza Miranda PCP, nagsasagawa sila ng clearing operations kontra illegal vendors sa may Carriedo Street alas-3:30 ng hapon, nang maaktuhan ang 60-anyos na suspek na nagbebenta ng umano'y ipinagbabawal na gamot.

Aabot sa halagang P50,000 o 179 na banig ng magkakahalong Cytotec, Methergin at Arthroteco — kapwa mga gamot na kilalang pampalaglag ng bata ang nakumpiska mula sa suspek.

Babaeng senior citizen, arestado matapos mahulihan na nagbebenta ng mga gamot 'pampalaglag ng bata' sa Quiapo; Ayon sa MPD, matagal nang pinaghahanap ang 60 anyos na suspek, na isa sa mga malaking supplier ng mga nasabing gamot pic.twitter.com/gnHu0lJ00u

— Angel Movido (@angelmovido) March 31, 2018

Ayon kay Gutierrez, matagal na nilang pinaghahahanap ang suspek na isa umano sa pinakamalaking supplier ng mga nasabing gamot sa Quiapo.

Hindi rin inaalis ng Manila Police District ang posibilidad na marami pang mga pampalaglag na gamot ang naipupuslit sa mga vendor sa Quiapo.

Depensa naman ng suspek, bago lamang siya sa pagbebenta at kinailangan para masuportahan ang pamilya. Aniya, isang Pakistani national ang kaniyang pinagkukunan ng mga gamot.

Tumanggi namang magbigay ng pahayag ang pamunuan ng Quiapo Church.

Nahaharap ang suspek sa kasong paglabag sa Republic Act 9711 o Food and Drug Administration Act of 2009 at city ordinance on illegal vending.

Nakatakda ring ipasuri ng MPD ang mga gamot sa FDA.