MAYNILA - Natagpuang nakasilid sa sako ang bangkay ng isang babae na itinapon sa ilalim ng tulay sa Carmona, Cavite.

Ayon kay Patrolman Emerson Gusto, police investigator ng Carmona Police, nakatanggap sila ng tawag nitong Martes ng hapon kaugnay ng kakaibang amoy mula sa tulay.

Nang puntahan, nagmula sa isang malaking sako ang masangsang na amoy. Tumambad ang bangkay nang ito'y buksan.

Nakasuot ang babae ng multi-colored stripes na damit, itim na shorts, at silver na bracelet.

Walang nakuhang pagkakilanlan sa bangkay na nasa 5 feet hanggang 5'5 ang tangkad.

Dinala na sa crime laboratory ang mga labi para matukoy kung ano ang dahilan ng pagkamatay nito.