Magsasaka patay nang suwagin ng kalabaw

Mitch Lipa, ABS-CBN News

Posted at Mar 20 2018 05:03 PM

TALISAY CITY, Negros Occidental - Patay ang isang magsasaka matapos suwagin ng isang kalabaw Martes ng madaling araw sa isang hacienda sa Talisay City.

Kinilala ang biktima na si Juan Marcelo. Nakita ang bangkay niya na may sugat sa tiyan.

Ayon sa isa sa mga kasamahan ng biktima, tuwing alas-dos ng madaling araw siya nagsisimulang magtrabaho. Ginigising na rin niya ang kalabaw at nilalagyan ng karuwahe na siyang pagkakargahan ng tubo.

"Halog guro ang iya kamot nga naga uyat sang kalat mo, ang kapot ya bala halog guro," ani Joereme Marcelino.

(Maluwag siguro ang pagkakatali niya sa kalabaw kaya nagawa pa rin nitong magwala.)

Dagdag pa ni Marcelino, maaring maluwag ang pagkakalagay ng lubid sa karuwahe kaya't nagawa pa rin ng kalabaw na suwagin si Marcelo.

Ayon naman sa timekeeper ng hacienda na si Bonifacio Gallo, ilang beses na nilang pinaalalahanan si Marcelo na mag-ingat sa kalabaw. Matanda na kasi ito at tila nagpapakita na ng senyales na tila nagagalit na kapag napapagod.

Pinagalitan at pinilit umano ni Marcelo na ikabit sa kalabaw ang karuwahe kaya't nagwala ito.

Ayon sa provincial veterinarian na si Renante Decena, kinakailangang maging mapagmatyag sa pagbabantay ng mga kalabaw. 

Nakakaapekto umano sa pag-uugali ng mga hayop ang mainit na panahon. Maari ring maging mabangis ang mga hayop na kulang sa pahinga at tubig, at kung nakakaranas ng pananakit mula sa mga tao.

Agad na ibinenta sa slaughter house ang kalabaw Martes ng umaga.

Pinaalalahanan naman ang mga ibang magsasaka na bigyan ng sapat na pahinga ang mga kalabaw para maiwasan na maulit ang insidente.

Bisitahin ang Patrol.PH para sa iba pang mga balita.