Pulis patay matapos sumalpok ang motorsiklo sa poste sa Isabela

ABS-CBN News

Posted at Mar 19 2021 01:37 AM

Kuha sa Quezon Police Station

Nasawi ang isang pulis matapos na sumalpok ang minamanehong motorsiklo sa konkretong poste sa bayan ng Quezon, Isabela, Sabado ng gabi.

Kinilala ang biktima na si Police Cpl. Saveric Tagao, 30, na nakatalagang patroller ng Mallig Police Station.

Ayon kay Police Maj. Roberto Valiente, hepe ng Quezon Police Sation, patungong hilagang direksyon ang pulis sakay ng kaniyang motorsiklo nang sumalpok ito sa isang kilometer post sa gilid ng kalsada sa Brgy. Alunan. 

Sa lakas ng pagbangga, tumilapon ang biktima na nagtamo ng malalang pinsala sa ulo at naging dahilan ng agaran niyang pagkamatay.

Napag-alamang walang suot na helmet ang pulis nang mangyari ang aksidente.

Lumabas din sa imbestigasyon na walang ibang sangkot na sasakyan sa pagkamatay ng biktima, taliwas sa naunang naiulat ng Quezon Police. 

Tinitingnan din ang isang dahilan ng aksidente ay ang kawalan ng ilaw sa lugar. 

Patuloy rin ang imbestigasyon ng Quezon Police. -- Ulat ni Harris Julio


MULA SA ARKIBO

Watch more in iWantTFC
Bisitahin ang Patrol.PH para sa iba pang mga balita.