MAYNILA - Kasado na sa susunod na linggo ang pagpapamahagi ng P6,500 na fuel subsidy sa mga driver ng pampublikong sasakyan, sa harap ng serye ng mga taas-presyo sa langis.

• DBM: P2.5 billion funds for fuel subsidy may be released this weekend

Ayon kay Land Transportation Franchising and Regulatory Board Executive Director Maria Kristina Cassion, kukunin na ng transportation department ang pondo ngayong Biyernes.

Dahil dito, puwede na aniyang mapondohan ang fuel cards ng mga jeepney driver sa susunod na linggo.

Nagpapatuloy naman ang pakikipag-ugnayan ng ahensiya sa interior at trade departments para matukoy ang iba pang benepisyaryo gaya ng tricycle at Transport Network Vehicle Service (TNVS) drivers.

Ang Department of Agriculture naman ang bahala sa P500 milyong pondo para sa fuel subsidy ng mga magsasaka.

Vouchers ang ibibigay sa kanila sa pamamagitan ng Development Bank of the Philippines.

"Pupunta po sila doon sa mga tinalaga ng Landbank na branches para mag-process ng kanilang fuel cards dahil fuel cards po talaga ang ating mode. Hindi po kasi ito cash subsidy, fuel subsidy po talaga. Doon sa card ilalagay ang plate number ng mga pampublikong sasakyan," ani Cassion.