Patay ang isang lalaki sa isang engkuwentro ng mga pulis matapos umano itong mangholdap sa Caloocan.

Inaalam pa ng pulisya ang tunay na pagkakakilanlan ng holdaper na kilala lamang bilang alyas "Tangkad".

Batay sa imbestigasyon, hinoldap ng lalaki at ng kasamahan nito ang isang babae na nag-aabang ng masasakyang jeep sa Barangay 138, Bagong Barrio.

Tinutukan umano nila ng baril ang biktima at inagaw ang bag.

Agad humingi ng tulong ang biktima sa isang convenience store nang makaalis ang 2 lalaki sakay ng isang motorsiklo.

Sakto naman may mga mga pulis na nakasibilyan doon.

Nang mamataan ang mga nangholdap, nagkaroon ng habulan hanggang sa makorner sila sa isang madilim na bahagi ng Barangay 160.

Nagkaroon ng palitan ng putok kung saan nasawi ang angkas habang nakatakas ang drayber.

Narekober mula sa napatay na lalaki ang kalibre .38 na baril at ang bag ng biktima na naglalaman ng wallet at pera. - ulat ni Dennis Datu, ABS-CBN News