Watch more in iWantv or TFC.tv

Away sa lupa ang tinitingnang motibo ng pulisya sa pananambang sa mag-asawang sakay ng SUV sa Antipolo alas-5:20 ng hapon Miyerkoles.

Sakay ng kotse ang mag-asawa at kanilang apo nang biglang pagbabarilin ng hindi pa nakikilalang lalaki habang papalagpas sa isang intersection.

Nagkarambola pa ang ilang mga sasakyan nang mawalan na ng kontrol ang binaril na biktima.

Dead-on-the spot ang mag-asawa habang nakaligtas naman ang kanilang apo.

Isa sa tinitingnang anggulo ng pulis ay away sa lupa dahil isang barangay administrator at presidente rin ng homeowners association ang lalaking biktima.

Ayon sa officer-in-charge ng Antipolo police na si Superintendent Serefin Petalio, matagal nang problema sa lugar ang mga away sa lupa.

Patuloy ang imbestigasyon sa insidente at tinutugis na rin ang nakatakas na gunman.

--Ulat nina Jervis Manahan at Angel Movido, ABS-CBN News