Nagsagawa ngayong Huwebes ng penitential walk o "alay lakad" ang Manila Archdiocese para ipagdasal ang mga botante sa pagpili ng mga bagong lider ng bansa sa Halalan 2022.

Isinagawa ang penitential walk sa kaparehong araw ng paggunita sa ika-150 na anibersaryo ng pagiging martir ng tatlong pari na sina Mariano Gomez, Jose Burgos, at Jacinto Zamora, o ang GomBurZa.

Bago ang alay lakad, isang misa ang isinagawa na pinangunahan ni Cardinal Jose Advincula.

Sa kaniyang homily, binigyang diin ni Cardinal Advincula ang tatlong katangiang taglay aniya ng mga paring martir: ang pagiging maka-Diyos, payak, at makabayan. Dapat umanong pamarisan ng lahat ang mga katangiang ito.

Nananawagan din Cardinal Advincula sa mga botante na pag-isipang mabuti ang mga pipiliing lider sa darating na halalan.

Iginiit naman ni Novaliches Bishop Emeritus Teodoro Bacani na dapat pagsisihan ng mga tao ang kanilang mga pagkakasala.

Maipapakita aniya ang pagsisisi sa pagbabago ng ugali, na sasalamin din sa pagpili sa lider.

Ayon kay Bacani, kung maka-Diyos at makabayan ang isang tao ay pipili ito ng tamang lider tulad ng GomBurZa.

Mula sa Manila Cathedral, naglakad patungo sa GomBurZa memorial marker sa Rizal Park ang mga pari at saglit na nag-alay ng dasal.

Sa Shrine of Nuestra Señora de Guia sa Ermita nagtapos ang kanilang alay lakad.

• CBCP releases prayer for 2022 elections