PatrolPH

Mga umuwing Pinoy mula sa Myanmar, nakahinga na ng maluwag matapos maranasan ang tensyon doon

Johnson Manabat, ABS-CBN News

Posted at Feb 16 2021 12:20 AM

MAYNILA - Umabot sa 139 na mga Filipino repatriates ang dumating sa bansa kanina lulan ng chartered flight ng pamahalaan mula sa Myanmar. 

Kabilang dito ang 40-anyos na si "Baby" na principal sa isang pre-school doon.

Kasamang dumating sa bansa ni Baby ang kaniyang mag-ama.

“Nakakatakot po, pasalamat na lang po kami at nakarating po kami ng maayos, nakaranas din po kami ng takot doon. Kasi po every 8 o’clock nakakarinig po kami ng screaming ng tao," aniya.

Mahigit 10 taong nakabase sa Myanmar si Baby kaya napamahal na rin sa kanya ang Myanmar. 

Gayunman, mas minabuti niya at ng kaniyang pamilya na umuwi na ng Pilipinas para na rin sa kanilang kapanatagan. 

Magpapatuloy pa rin naman anya ang kaniyang trabaho bilang principal ng pinapasukang eskwelahan sa Myanmar at gagawin na lang muna niya online ang kaniyang mga obligasyon sa eskwela.

Isa rin sa mga umuwi si Gil Magbanua. Kabilang siya sa mga nawalan ng trabaho sa pinapasukan niyang hotel sa Myanmar simula nang tumama ang pandemyang dala ng COVID-19. 

Simula noong Marso 2020, natigil ang kanilang pasok bilang mga hotel staff. 

Gayunman, laking pasalamat ni Magbanua sa kanyang employer dahil kahit nawalan ng customer ang pinapasukang hotel, ibinibigay pa rin nito ang 25 porsyento ng kanilang buwanang sahod para lang makaraos sa kanilang pangangailangan. 

“Sa ngayon po gawa ng kudeta mahigpit... tinanggal yung Facebook, wifi, halos lahat ng tinanggal, mayroon po siyang curfew ng 8 ng gabi," aniya.

Galing pa sa dulong bahagi ng Myanmar si Magbanua, o halos boundary na aniya ng Thailand at Myanmar at kinailangan pa nilang bumiyahe sa pamamagitan ng bus nang halos dalawang araw para marating ang Yangon City. 

Ayon kay Magbanua, sakaling gumanda na ulit ang sitwasyon sa Myanmar at kukunin ulit ang kanilang serbisyo ng kanilang dating employer ay handa naman siyang bumalik doon para muling magtrabaho. 

Sa ngayon, tatapusin na lang muna ni Magbanua at ng kaniyang mga kasamahang nawalan ng trabaho ang kanilang anim na araw na mandatory quarantine sa bansa.

Plano niya na mag-negosyo na lang muna pag-uwi sa kanilang bayan sa Marilao, Bulacan.

Anim na taon namang nagturo sa Myanmar si Hazel Anbancoyo at dahil sa kudeta, nagpasya siya na umuwi na muna ng Pilipinas kasama ang kaniyang mga anak. 

“Medyo may gulo, may rally araw-araw," aniya.

Dahil rin umano paputol-putol ang koneksyon ng internet sa Myanmar ay hindi rin sila makapagtrabaho nang maayos.

Tatapusin na lang din muna ng pamilya ni Anbancoyo ang kanilang quarantine bago umuwi sa kanilang pamilya sa Leyte. 

Mismong si Foreign Affairs Secretary Teodoro Locsin Jr. ang sumalubong sa mga Pilipinong umuwi galing Myanmar.

RELATED VIDEO

Watch more on iWantTFC
Bisitahin ang Patrol.PH para sa iba pang mga balita.