8 sugatan sa pagsabog ng granada sa North Cotabato

Jasper Acosta and Rodney Ontolan, ABS-CBN News

Posted at Feb 08 2018 06:54 PM | Updated as of Aug 31 2018 09:09 PM

Ginulantang ng pagsabog ang bayan ng Banisilan, North Cotabato pasado alas-8 ng gabi Miyerkoles, bisperas ng selebrasyon ng ika-36 na anibersaryo ng munisipyo.

Sumabog ang granada sa isa sa mga itinayong tent ilang metro ang layo mula sa municipal gymnasium.

Walo ang sugatan sa insidente. Kinilala ang mga biktima na sina Kingboy Kadil, Sairadin Panangulon, Pax Kadil, Solaiman Amad, Jeffrey Salunayan, Linto Mamukaw, Pedro Tabaosares at Esmael Canedo.

Ayon kay Senior Insp. Wilson Maggay, hepe ng Banisilan Police, naganap ang pagsabog halos isang minuto matapos mawalan ng kuryente sa bayan. 

Hindi pa natukoy ang taong naghagis ng granada.

Sa follow-up investigation ng North Cotabato Provincial Police, lumalabas na rido o away pamilya dahil sa alitan sa lupa ang motibo sa likod ng pagpapasabog.

Posibleng target umano ng salarin ang barangay chairman ng Pantar na si Sani Kadil na umupo sa tent nang maganap ang pagsabog.

Bagama't hindi nasugatan si Kadil, sugatan naman ang anak nitong si Kingboy.

Sa kabila ng naganap na pagsabog, ipinagpatuloy pa rin ang mga aktibidad para sa pista ngayong Huwebes.

Bisitahin ang Patrol.PH para sa iba pang mga balita.