ZAMBOANGA CITY -- Kasalukuyang nagpapagaling sa isang pribadong ospital sa lungsod na ito at sa Camp General Navarro Hospital ang ilang sundalong nasugatan sa engkwentro laban sa Abu Sayyaf Group sa Patikul, Sulu.

Ayon kay Colonel Gerry Besana ng Western Mindanao Command, mismong si Lieutenant General Arnel Dela Vega ang nagbigay ng mga medalya sa mga nasugatan.

Walo ang dinala sa Zamboanga City, habang 10 iba pa ang nasa Sulu.

"Medyong tinututukan natin 'yung nasa Zamboanga City Medical Center. Kailangan talaga niyang ma-operahan, mabigyan agad ng medical attention," paliwanag ni Besana.

Maliban sa mga sugatan, dinala rin sa Zamboanga City ang limang sundalong namatay sa engkwentro.

"'Yung mga patay inaayos na sila upang maihatid na sa kani-kanilang pamilya," ani Besana.

Patuloy ang ginagawang pagtugis ng militar sa mga bandidong grupo sa Sulu sa mga oras na ito.