Watch more in iWantv or TFC.tv

Umusok ang bahagi ng isang bagon ng MRT-3 kaya bumaba at naglakad sa riles ang nasa 600 pasahero nitong Biyernes, bandang 1:40 ng hapon.

Nagmula umano ang usok sa upuan ng mga pasahero ng tren na patungo sa Cubao Station mula Kamuning.

Nasa ilalim kasi ng upuan ang regulator ng tren o ang kumokontrol ng pasok ng kuryente sa sistema.

Ibinahagi pa ng Twitter user na si @iamludo ang video ng nasabing tren na huminto sa tapat ng Mega Q-Mart market.

Passed by MRT minutes ago and saw this. @ABSCBNNews @ANCALERTS @gmanews @gmanewsbreaking @rapplerdotcom pic.twitter.com/gulPOtuACY

— Ludo (@iamludo) January 26, 2018

Dumating naman ang mga bumbero makaraan ang ilang minuto para apulahin ang usok ngunit nasakop nila ang dalawang lane sa EDSA na nagdulot ng pagbagal ng daloy ng trapiko sa lugar.

Samantala, tila prusisyon din sa ibabaw ng riles ng MRT ang nasa 600 na apektadong pasahero.

JUST IN: Mga pasahero ng MRT, pinababa sa pagitan ng Kamuning at Cubao stations kaninang 1:42 pm dahil sa nakitang usok malapit sa pintuan ng tren | via @joycebalancio

— DZMM TeleRadyo (@DZMMTeleRadyo) January 26, 2018

Pinilit pa umano ng mga pasahero na buksan ang pinto at maglakad sa riles nang makita ang usok.

Ibinalik na naman sa depot ang tren para ayusin at alamin kung bakit umusok ang regulator.

Aabutin ng tatlong araw bago magamit uli ang nasabing tren lalo na at basang-basa ang loob nito at kailangang kalasin.

Siniguro rin anila na ligtas ang tren bago iniakyat sa linya at posibleng sa biyahe na ito nagkaproblema.

Dahil sa insidente, mababawasan muli ang bilang ng mapapatakbong tren.

Ngayong Biyernes, alas-6 ng gabi, siyam na lang ang tumatakbong tren ng MRT at hindi rin umano nila matitiyak na hindi mauulit ang aberya o mababawasan pang muli ang bilang nito.

-- Ulat ni Jacque Manabat, ABS-CBN News