MAYNILA - Nagmartsa patungong Mendiola ang mga miyembro ng iba't ibang militanteng grupo ngayong Lunes upang kondenahin ang ilang polisyang isinusulong ng administrasyong Duterte, katulad ng charter change at tax reform.

Itinaon ng mga militante ang protesta sa paggunita ng ika-31 anibersaryo ng Mendiola Massacre kung saan 13 magsasaka at manggagawang may hinaing sa gobyerno ang namatay sa marahas na dispersal ng puwersa ng estado.

Giit ng mga aktibista, higit 3 dekada na ang nakalilipas pero nananatili pa ring mahirap ang sitwasyon ng mga magsasakang Filipino dahil sa kawalan ng tunay na repormang agraryo mula sa gobyerno.

Binanatan din ng mga militanteng grupo ang panukalang charter change na layon anilang palawigin ang foreign ownership sa probisyong pang-ekonomiya ng Saligang Batas.

Kinondena rin ng mga nagprotesta ang tax reform na nagbawas ng buwis sa sahod ng mga empleyado pero nagtaas ng buwis sa langis; gayundin ang martial law sa Mindanao; ang umano'y namumuong diktadura; at ang anila'y extra-judicial killings.

Kabilang sa mga grupong lumahok sa rally sa Mendiola ang Kilusang Magsasaka ng Pilipinas, Bayan Muna, Pamapalakaya, Anakpawis, Gabriela, Sama-samang Artista para sa Kilusang Agraryo, at iba pa.

--ulat mula kay Zhander Cayabyab, ABS-CBN News