1 patay, 5 sugatan sa rambol sa bar sa Naga City

Rizza Mostar, ABS-CBN News

Posted at Jan 21 2018 06:52 PM

NAGA CITY -- Patay ang supervisor ng isang bar habang sugatan ang limang iba pa sa isang rambol sa Barangay Sta. Cruz, Naga City madaling araw ng Linggo.

Nagsimula ang rambol sa loob ng isang maliit na bar sa Barlin Street. Umabot hanggang kalsada ang away.

Marami ang nakakita sa dalawang lalaki na sinusuntok ang isa pa na nakabagsak na sa kalsada.

Kinilala ang dalawang lalaki na sina Aladino Fernandez at Joshua Francisco, mga waiter ng bar.

Nagsimula umano ang away nang hindi nila pagbigyang umorder pa ang limang magkakasamang customer.

Dead on arrival naman sa ospital si Jeric Recasio, supervisor ng bar. Sinaksak ito sa leeg sa loob ng banyo.

Sinundo ng pulisya sa ospital ang tatlo sa limang customer para imbestigahan.

Sugatan ang mga ito pero nakatakas ang dalawa nilang kasamahan na parehong babae.

Isa sa kanila ang positibong itinuro ni Francisco na siyang sumaksak kay Recasio.

Tumanggi ang tatlo na magbigay ng pahayag sa insidente.

Ilang insidente na ng rambol ang naitala sa mga inuman sa lugar. Ang ilan dito, walang mga guwardiya o CCTV, ayon sa mga pulis.

Sa tulong ng mga testigo sa pangyayari, kakasuhan ng physical injuries, malicious mischief, estafa at murder ang tatlong magkakapatid na customer.

Nakahanda naman umano silang magsampa ng kontra demanda.

Bisitahin ang Patrol.PH para sa iba pang mga balita.