Shabu na tinago sa kahon ng posporo, iba pang kontrabando nakumpiska sa Bilibid

ABS-CBN News

Posted at Jan 16 2020 05:12 PM | Updated as of Jan 16 2020 08:24 PM

Watch more in iWant or TFC.tv

Ilang sachet ng shabu, mga improvised na patalim, pera at iba pang kontrabando ang nakumpiska ng mga awtoridad sa mga preso sa loob ng New Bilibid Prison ngayong Huwebes.

Bandang umaga nang magkasa ng "Oplan Galugad" ang mga tauhan ng Bureau of Corrections (BuCor) at Bureau of Jail Management and Penology (BJMP) sa Reception and Diagnostic Center (RDC) ng Bilibid, kung saan isa-isang hinalughog ang mga detention cell.

Nakuha sa mga nakapiit ang mga droga at kontrabando, kabilang ang mga sachet ng shabu na itinago sa mga kahon ng posporo.

Sa RDC ipinapasok ang mga bagong salta sa Bilibid o iyong mga kagagaling lang ng mga city jail.

Mananatili ang mga bagong salta sa RDC sa loob ng 60 araw para dumaan sa assessment bago ihalo sa iba pang mga nakakulong sa maximum, medium o minimum security compound.

Layon ng "Oplan Galugad" na disiplinahin at malaman agad ng mga bagong pasok sa Bilibid na hindi nito kukunsintihin ang ano mang kalokohan, gaya ng pagpasok ng mga kontrabando, ayon sa public information officer ng Bilibid na si Gabriel Chaclag.

Iniimbestigahan na rin ng BuCor kung paano napuslit ang mga kontrabando.

-- Ulat ni Jerome Lantin, ABS-CBN News

Bisitahin ang Patrol.PH para sa iba pang mga balita.