MAYNILA (UPDATE) — Panandaliang nahinto ang operasyon ng LRT-1 ngayong Miyerkoles ng umaga matapos mahulog sa riles ang isang babaeng pasahero, ayon sa awtoridad.

Nahilo ang naturang pasahero bago ito mahulog sa riles sa Doroteo Jose Station, ani Jacqueline Gorospe, corporate communications head ng Light Rail Manila Corporation.

Itinigil aniya ang operasyon ng LRT-1 para matulungan ang babae, na dinala agad sa ospital. Nagtamo ito ng galos sa mukha at patuloy na inoobserbahan, ayon kay Jun Rodriguez, supervisor ng LRT-1 sa Doroteo Jose Station.

Muling nagpaalala ang mga awtoridad sa mga pasahero na kung makaramdam ng pagkahilo ay ipagbigay-alam sa kanilang mga guwardiya at mga kasabay na pasahero para matulungan.

Humingi naman ng paumanhin ang pamunuan ng LRT-1 sa mga naabalang pasahero.

Balik-normal na ang operasyon ng railway, dakong alas-8 ng umaga. --May ulat ni Johnson Manabat, ABS-CBN News