Isa ang patay habang tatlo pa ang nawawala kasunod ng pagguho ng lupa at malaking pader sa Tacloban city.

Bumigay ang pader kasabay ng pagguho ng lupa bunsod ng walang tigil na malakas na ulan sa lungsod kagabi, Enero 13.

• PANOORIN: Tacloban binaha dulot ng malakas na ulan

Natukoy ang nasawing biktima na si Delia Carson, 64 anyos, chief tanod ng Barangay 43-B.

Kuwento ng kaniyang nakaligtas na mister na si Sonny Carson, lumabas ng bahay si Sonny para tingnan ang itinuturo ng kapitbahay na pagguho ng lupa.

Hindi aniya nagtagal, biglang bumigay ang pader sa kanilang lugar.

Nadaganan din siya ng ilang natumbang kahoy, pero nakaligtas din naman siya at ang apo.

Tatlong iba pa ang nawawala at pinangangambahang natabunan ng gumuhong lupa.

Patuloy naman ang paghahanap sa kanila, pero pahirapan ito dahil na rin sa patuloy na pag-ulan.

Ayon naman kay Tacloban City Mayor Cristina Romualdez, iimbestigahan nila kung bakit gano'n kadaling bumigay ang malaking pader na nakapaligid sa mga bahay.

Nanawagan din siya sa mga residenteng nasa landslide-prone areas na lumikas na para maiwasan ang peligrong may matabunan pang muli ng guho.

Sinegundahan ito ng Office of Civil Defense na nagsabing inaasahan pa rin ang malalakas na ulan ngayong Linggo.

-- Ulat nina Jenette Ruedas at Ranulfo Docdocan, ABS-CBN News