Watch more News on iWantTFC

Mas maayos na daloy ng trapiko ang sumalubong ngayong Huwebes sa mga motoristang dumadaan sa Marikina Bridge matapos magpatupad ng bagong traffic scheme.

Ito'y matapos isara ang bahagi ng isang lane ng tulay na papuntang Cubao, Quezon City matapos makitaan ng mga bitak.

Sa rerouting shceme, hindi na muna pinapadaan sa Marikina Bridge ang mga truck para hindi maapektuhan ang mga motorista.

Naglagay din ng zipper lane para maging 2 ang lane na dadaanan ng mga motorista pa-Cubao, ayon kay Marikina Mayor Marcelino Teodoro.

"Nagdagdag tayo ng zipper lane para ang mga palabas ng Marikina ay mabilis na makalabas at makatungo sa kanilang paroroonan," sabi ng alkalde.

• Bahagi ng Marikina Bridge sarado para sa pagsasaayos

Ginhawa naman para sa ilang motorista ang rerouting scheme.

"Hindi naman masyadong traffic kompara noong mga nakaraang araw," sabi ni Manuel Estolata, na araw-araw dumadaan ng tulay.

Ayon kay Teodoro, patuloy ang pagsasaayos sa bahagi ng tulay, na inaasahang magagamit ulit sa weekend.

Suspendido din muna ang trabaho sa ginagawang drainage system, na sinasabing sanhi ng bitak sa tulay, ani Teodoro.

—Ulat ni Jose Carretero, ABS-CBN News