MAYNILA — Nagpaalala ngayong Martes si Tourism Secretary Bernadette Romulo-Puyat sa mga hotel na nagsisilbing quarantine facility na hindi maaaring tumanggap ang mga ito ng "staycation" guests.

Ayon kay Puyat, maaaring ipasara ang mga hotel na parehong magsisilbing quarantine facility at pang-staycation.

"Nagbigay na kami ng warnings. Kung gawin pa nila ulit, isasara na sila. Kung sige pa rin ang pagsisinungaling, siguro naman ipapasara na sila," ani Puyat sa isang press briefing.

Ayon kay Puyat, ang mga sumusunod na hotel lamang sa Metro Manila ang maaaring tumanggap ng staycation:

• Grand Hyatt Hotel
• Makati Shangri-La Hotel
• Okada Manila Hotel
• Shangri-La at the Fort
• Nobu Hotel
• Joy Nostalg Hotel & Suites Manila
• EDSA Shangri-La Manila
• Solaire Resort
• Hyatt Regency City of Dreams
• Nuwa Hotel City of Dreams
• The Peninsula Manila
• Aruga by Rockwell
• Sheraton Manila Hotel
• Hilton Manila & Hotel Okura Manila

Puwede naman daw mag-apply ang ibang 4- o 5-star hotel ng lisensiya para mag-operate bilang staycation hotel, sabi ni Puyat.

"Kung gusto n'yo mag-open for leisure, mag-apply kayo. Kung quarantine facility then quarantine," anang kalihim.

Noong mga huling buwan ng nakaraang taon, pinayagan na ang staycation sa mga lugar na nasa ilalim ng general community quarantine, na layon ding mapalakas ang domestic tourism.

• DOT says staycations to help boost domestic tourism amid pandemic; hotel industry 'optimistic'

-- Ulat ni Jeff Canoy, ABS-CBN News