Watch more News on iWantTFC

MAYNILA — Nagdagdag na ang Land Transportation Franchising and Regulatory Board (LTFRB) ng 42 rescue units sa EDSA Bus Carousel bilang tugon sa problema ng kakulangan sa mga bus.

Kung dati, limitado lang ang mga biyahe sa gabi, mas dumami na ngayon ang mga bus na bumibiyahe.

• Lack of buses, drivers cited among factors in EDSA Busway congestion

Base sa Board Resolution No. 191 ng LTFRB, mas mababa sa required number of units ang bumibiyahe sa EDSA Busway nitong mga nakalipas na araw.

Dahil dito, naging pahirapan ang pagsakay dito tuwing peak hours.

Simula nitong Martes ng gabi, umarangkada na ang mga rescue bus na bibiyahe mula 6 p.m. hanggang 6 a.m.

Watch more News on iWantTFC

Pero nilinaw ng LTFRB "trial" lang muna ito sa ngayon at ipapatupad lamang hanggang sa susunod na Lunes, Enero 16.

Ramdam naman ng mga commuter ang pagdami ng mga bus at hindi na umano sila nahirapan na sumakay ngayong Miyerkules.

Panawagan lang nila, sana ay magtuloy-tuloy na ang pag-arangkada ng mga karagdagang bus unit sa EDSA Carousel.

Humingi naman ng pang-unawa ang ilang bus driver sa mga pasahero lalo na sa mga umuuwi tuwing gabi.

"Kahit na madaming pasahero parang hindi ramdam kasi dumadami na yung units na mga rescue (units) po. Inaabot kasi ng siguro approximately 2 hanggang 3 oras. Kada akyat mo ng bus, mas mabilis na kasi sunod-sunod iyong mga bus na dine-deploy," ani Ivan Germino, isang commuter.

Sabi naman ng bus driver na si Raymundo de Leon: "Malaki ang tulong nitong rescue para sa mga pasahero po natin... Sana po sa mga pasahero natin katulad po ng panggabi po kami, eh sana maunawaan n'yo rin po kami. Kasi meron ding mga pasaheros po na maiinit ang ulo kaya kami nagpapasensya na lang."

Pagkatapos ng isang linggo, inaasahang pag-uusapang muli ng pamunuan ng LTFRB kasama ang mga operator ng mga rescue units kung paano isasapinal o aayusin pa ang bagong sistema.

• Govt to end free rides for EDSA bus carousel starting Jan. 1, 2023

—Ulat ni Karen De Guzman, ABS-CBN News