Binaha ang ilang bahagi ng Northern Samar dahil sa malakas na pag-ulan na dala ng isang low pressure area.

Umapaw ang ilog sa Barangay Irawahan, Catubig, Northern Samar dala ng tuloy-tuloy na ulan mula Martes, Enero 10. Dahil dito, lubog na sa baha ang mga bahay na makikita sa padalang video ni Bayan Patroller Ric Daryl Segun.

Ayon kay Segun, nagsimulang tumaas ang tubig Martes na umabot ng lagpas tao sa mga mababang lugar at hanggang baywang naman sa matataas na lugar.

Paunti-unti na aniyang bumaba ang baha sa kanilang lugar, ngunit patuloy pa rin ang pag–ulan. Panawagan niya, sana ay mabigyan na sila ng relief goods ng lokal na pamahalaan.

Samantala, kita sa nakuhang video ni Bayan Patroller Sol Dulay Apolong ang pag-apaw ng tubig sa karatig na ilog na pumasok na sa mga bahay sa Barangay Magtaon, Mapanas, Northern Samar nitong Martes ng umaga.

Madalas aniyang bumaha sa kanilang lugar lalo na kapag malakas ang ulan.

Bagamat humupa na ang baha ngayong Miyerkoles ng umaga, patuloy pa rin ang pag-ulan at pagtaas ng tubig sa ilog.

• Rainy weather in Bicol Region, VisMin due to LPA, shear line
• 10 people killed due to January bad weather: disaster agency

— ulat ni Shadrach S. Corro