PatrolPH

Pulis na bumaril sa mag-ina sa Tarlac, naghain ng not guilty plea

ABS-CBN News

Posted at Jan 10 2021 04:29 PM | Updated as of Jan 11 2021 01:44 PM

Pulis na bumaril sa mag-ina sa Tarlac, naghain ng not guilty plea 1
Mugshot ni Police Staff Sgt. Jonel Nuezca. ABS-CBN News/File

MAYNILA (UPDATE) — Naghain ng not guilty plea sa kasong murder ang pulis na nakuhanan ng video na bumaril sa dalawa niyang kapitbahay sa Paniqui, Tarlac noong Disyembre.

Ayon kay Paniqui Municipal Police Station chief Noriel Rombaoa, isinagawa ang arraignment ng kaso ni Police Staff Sgt. Jonel Nuezca noong Enero 7.

Hindi aktuwal na nakasipot sa korte si Nuezca dahil kasalukuyan siyang nasa 21 araw na quarantine sa pasilidad ng Bureau of Jail Management and Penology sa Paniqui. 

Sa pamamagitan ng video conference, nabasahan ng sakdal sa 2 bilang ng murder si Nuezca dahil sa pagpatay sa mag-inang sina Sonia at Frank Anthony Gregorio.

“Naka-isolate pa siya kasi 21 days ‘yung requirements from BJMP,” ani Rombaoa.

Watch more on iWantTFC

Dumalo naman sa arraignment ang abogado ni Nuezca, ganun rin ang pamilya at abogado ng mga biktima. 

Ang susunod na pagdinig sa kaso ay sa Pebrero 4 kung saan inaasahan nang pisikal na makadadalo si Nuezca.

"Normal" lamang ang paghahain ng not guilty plea ni Nuezca, ayon kay Ferdie Villamor, abogado ng pamilya Gregorio.

"'Yun pong napanood natin sa video, nakita ng eyewitnesses, lahat po 'yan ay 'di pa po part ng ebidensiya ng trial proper. Kumbaga as of now the accused is still presumed innocent until proven guilty," aniya sa Teleradyo nitong Lunes.

"Normal lang po yun, ang nangyari po kasi dun lang siya nagkaroon ng abogado. Maaari pong since wala pang panahon o oportunidad na pagaralan ng abogado niya ang kaso, yun po ang naging advice ng lawyer niya na mag apela muna ng not guilty."

RELATED VIDEO:

Watch more on iWantTFC
Bisitahin ang Patrol.PH para sa iba pang mga balita.