Opisina ng LTFRB, pansamantalang magsasara

ABS-CBN News

Posted at Jan 06 2022 10:29 AM

MANILA - Inanunsiyo ng Land Transportation Franchising and Regulatory Board (LTFRB) na pansamantalang magsasarado ang kanilang central office mula Huwebes, Enero 6, hanggang Biyernes, Enero 7.

Ayon sa ahensya, hindi rin magiging aktibo ang kanilang 24/7 hotline na 1342 simula Huwebes hanggang Linggo, ika-9 ng Enero.

Sa isang pahayag, sinabi ng LTFRB na dadaan sa mass swab testing ang kanilang mga empleyado sa mga nasabing araw. Isasailalim din ang kanilang mga pasilidad sa masusing disinfection.

Kasunod ito ng pagtaas ng bilang ng mga kaso ng COVID-19 sa bansa.

Payo ng LTFRB, maaaring magpadala ng mensahe sa kanilang LTFRB Official Facebook page ang mga nais maghayag ng kanilang ulat o katanungan sa kanilang ahensya.

Maaari ring magpadala ng e-mail sa kanilang Public Assistance Complaints Desk (PACD) sa pacd@ltfrb.gov.ph.

Watch more News on iWantTFC