4 na Pilipinong mangingisda, nasagip sa Malaysia

Jervis Manahan, ABS-CBN News

Posted at Jan 05 2018 11:28 AM

PUERTO PRINCESA - Apat na Pilipinong mangingisda na mula pa sa Navotas ang nasagip sa Malaysia, isang linggo matapos manalasa ang bagyong Vinta.

Na-rescue ng Malaysian Marines at naipasa na sa pangangalaga ng local government unit ng Taganak Island (Turtle Island) na bahagi ng Tawi-tawi ang mga mangingisda na sina Arnel Viana, Tomas Taboso, Joseph Jarina, at Roger Chavez, ayon sa mga opisyal mula sa Palawan Provincial Disaster Risk Reduction and Management Office.

Ayon sa tagapagsalita ng Palawan Provincial Government, nasa maayos na kondisyon na ang apat na lalaki nang dalhin sa Tawi-tawi noong ika-29 ng Disyembre 2017.

Bukod sa 4 na nasagip, 3 bangkay pa umano ang inanod sa Malaysia.

Inaalam pa ng mga awtoridad ang pagkakakilanlan ng mga nasawi.

Daan-daan ang namatay at libu-libo ang nawalan ng tahanan sa paghagupit ng bagyong Vinta sa ilang parte ng Palawan, Visayas, at Mindanao ilang araw bago mag-Pasko.

Bisitahin ang Patrol.PH para sa iba pang mga balita.