Dalawang magkapatid na mga dating seaman ang nalunod matapos maligo sa dagat sa Mayorga, Leyte sa pagsalubong ng Bagong Taon, Enero 1.

Sa imbestigasyon ng Mayorga PNP, tanghali noong Linggo nauwi sa trahedya ang masaya sanang pagtitipon ng pamilya Oledan.

Habang naliligo umano ang pamilya sa dagat sa bahagi ng Brgy. Liberty, sinagip ng magkapatid ang isang miyembro ng pamilya na humingi ng saklolo dahil natatangay ito ng malaking alon.

Nang mailigtas ng mga biktima ang kasamahan, bumalik ang dalawa sa dagat para maligo pero hinampas umano sila ng malaking alon at naanod sila.

• Trahedya sa company outing: 2 magkatrabaho nalunod sa Cavite

Agad nakita ang biktimang si Pastor Oledan, 56. Naisugod pa siya sa Abuyog District Hospital ngunit dineklara din siyang patay na ng doktor.

Dahil sa masamang panahon nahirapan, ang mga rescuer na mahanap agad ang katawan ng kapatid nito na si Geronimo Oledan.

Natapos ang paghahanap ng mga rescuer sa katawan ni Geronimo nitong Martes ng hapon sa bahagi ng Mayorga na malapit sa bayan ng MacArthur.—Ulat ni Ranulfo Docdocan

KAUGNAY NA ULAT

Watch more News on iWantTFC