ALAMIN: Epekto ng sobrang paghuhugas, pag-exfoliate ng mukha

ABS-CBN News

Posted at Nov 08 2019 08:17 PM

Watch more in iWant or TFC.tv

MAYNILA - Bagaman nakakabuti sa kutis, nagbabala ang isang eksperto na may masamang epekto sa balat ang sobrang paghuhugas ng mukha.

Ayon sa dermatologist na si Beverly Ong - Amoranto, nakakatuyo ng balat ang sobrang paghuhugas ng mukha.

"Too much washing of face will dry your skin even though you don't use soap," ayon kay Amoranto sa programang "Good Vibes" ng DZMM.

Maaari aniyang mas mabawasan, sa halip na madagdagan ang moisture sa mukha kapag sobra-sobra ang paghuhugas.

Maaari ring magdulot ng pamumula ng mukha, at mga butlig ang sobrang pag-exfoliate at pagkuskos ng mukha.

"If you exfoliate narereveal yung bago, newer skin. But too much can cause over-exfoliate and cause the skin to inflame... Magkakaroon ka ng butlig o milia," ani Amoranto.

Payo ni Amoranto , gawin lang ang pag-e-exfoliate isang beses sa isang linggo.

TAMANG FACIAL CREAM

Nagpayo rin si Amoranto tungkol sa tamang facial cream na gagamitin sa mukha.

Kung oily ang mukha, dapat gumamit ng mga gel cream. "Lighter siya sa skin," paliwanag ni Amoranto.

Dapat naman gumamit ng serum at ointment ang mga may dry na balat.

Nagpayo rin si Amoranto na dumulog sa doktor bago subukang gumamit ng mga facial products para maiwasan ang iba't ibang komplikasyon.

Bisitahin ang Patrol.PH para sa iba pang mga balita.