PatrolPH

Christ the Redeemer statue, bagong atraksiyon sa Davao Occidental

Berchan Angchay, ABS-CBN News

Posted at Jun 23 2020 05:46 PM

Christ the Redeemer statue, bagong atraksiyon sa Davao Occidental 1
Pinakabagong atraksiyon sa bayan ng Jose Abad Santos sa Davao Occidental ang Christ the Redeemer statue. Larawan mula kay Marke Dave Pangan

JOSE ABAD SANTOS, Davao Occidental – Makikita sa Joyce Paradise ang 35-talampakang taas na Christ the Redeemer statue at isang lighthouse. 

Ito ang pinakabagong atraksyon sa Barangay Culaman kung saan tanaw na tanaw ang munisipalidad. 

Kayumanggi ang mukha at kamay ng estatwa ni Kristo na sumisimbolo sa indigenous peoples’ community ng mga Manobo at Blaan. 

"Unlike sa statue sa Brazil, itong ating statue sa Pilipinas ay kulay kayumanggi. This is to give a Filipino identity to this landmark at lalong-lalo na para mas maging relatable sa mga constituents naming mga Manobo at Blaan at itong statue na rin ang nagsisimbolo ng malakas na pananampalataya," ani Jose Abad Santos Mayor Jason John Joyce. 

Huling quarter ng 2019 nang umpisahan ang proyekto at natapos lamang nitong Abril para sana sa Holy Week. 

"At sa dahan-dahang pagdating ng mga turista dito sa Jose Abad Santos, mas pagagandahin pa namin ang location ng Christ the Redeemer Statue which is in the Joyce Paradise and also mas palalakasin natin ang information campaign in the health protocols they have to observe," dagdag ng alkalde. 

Bukod sa sightseeing, mainam din ditong magdasal at mag-meditate. Ang mas nakatutuwa pa ay libre ang entrance dito.

Bisitahin ang Patrol.PH para sa iba pang mga balita.