PatrolPH

VIRAL: ABS-CBN reporter niyakap ng palaboy habang nag-uulat

ABS-CBN News

Posted at Apr 30 2022 02:04 PM | Updated as of Apr 30 2022 06:11 PM

Watch more News on iWantTFC

MANILA — Patapos na ang pag-uulat ng bagong ABS-CBN News reporter na si Larize "Izzy" Lee nitong Huwebes para sa programang "Sakto" sa TeleRadyo nang biglang nakita sa kamera na tinabihan siya ng isang babaeng palaboy.

Babalikan pa sana ng programa si Lee para sa ilan pang katanungan pero hindi na siya nakabalik sa ere. Iyon pala, niyakap na siya ng babae.

Hindi nakita sa report ni Lee ang nangyaring pagyakap, na ipinost niya sa Twitter ilang oras matapos ang kaniyang ulat.

"So this happened at work today," sabi ni Lee sa kaniyang tweet. "A free hug."

Watch more News on iWantTFC

Trending sa social media ang naturang larawan, at umani na ito ng higit 650,000 likes at halos 70,000 retweets sa Twitter.

Sa larawan, kitang nakangiti ang palaboy habang yakap si Lee. 

Sabi ni Lee sa isang panayam sa parehong programa kinabukasan Biyernes, hindi naman siya kinabahan noong mga oras na iyon.

"Hindi naman po ako kinabahan kasi mukhang gusto lang po ni ... Ma'am ay makita sa kamera kaya siya lumapit at dumikit sa akin," ani Lee. 

"Hindi ko po inasahan na mangyayari po iyon," dagdag niya.

Hindi na aniya nakausap ang babae dahil pinaalis na ito ng traffic enforcer. 

Noong Abril 29, nagpost ang netizen na si Patricia Pangilinan Macaldo sa kanyang social media account ng mga litrato ng kanya umanong "Tita Nena" kasama na din ang litrato ni Lee at ng palaboy. 

"Tita Nena sana ikaw na yan," sabi ng post ni Macaldo. "Sana makita kana namin sobrang tagal ka namin hinihintay na umuwe at hinanap kadin ng mga kapatid mo si lola bago pumanaw alam kong gustong gusto ka niya makita. Kapg naluluwas ako pa manila lahat talaga ng mga palaboy tinitingnan ko nagbabakasakali talaga akong makita ka pero wala." 

Nanawagan si Macaldo sa mga ibang mga netizen na kontakin siya sakaling makita nila ang kanyang Tita Nena, na higit isang dekada na umanong nawawala. 

 

May mga netizen na nag-message kay Lee na nagsasabing kamukha ng palaboy ang kanilang nawawalang nanay, lola, o tiyahin. 

"Hello. Good morning madam. Can please tell me where was this photo taken. Kasi kamukha nya yong mother ko na missing for more than two decades ago. Ang name po ng mother ko ay Betty Putor Barcenas po," sabi ng isang netizen mula Australia. 

Sabi ng isang netizen sa Twitter, "We lost my grandmother years back, I'll try to ask my mom the exact year because I was still a child that time. My lola's name is Rebecca and the woman in picture resembles her smile, so I just wanna cross-check some details." 

"Hi Good evening po. I am uncertain kung nasaan na po siya ngayon. Before po kasi doon sya sa barangay namin sa Tondo noon nung nagpapalaboy-laboy po. Yan mga po ang nagmessage po sa'kin na baka yun ang kanilang nawawalang tyahin. Wala po kaso ako masyadong alam sa background niya. At binansagan po syang Mayta sa lugar namin," sabi naman ng isang netizen na nag-iwan ng komento sa Facebook page ni Lee. 

– TeleRadyo, Abril 29, 2022

Bisitahin ang Patrol.PH para sa iba pang mga balita.