Watch more in iWantv or TFC.tv

Isa sa pinakapaboritong putaheng Pinoy ang beef pares, na karaniwan umanong matatagpuan sa maraming lugar sa kalakhang Maynila.

Ibinahagi ng guest kusinera ng "Umagang Kay Ganda" na si chef Verl Domingo kung papaano ito lutuin.

Aniya, walang gisa-gisa ang kaniyang recipe kaya't madali lamang itong lutuin.

Upang simulan ang paggawa sa beef pares, ihanda ang mga sumusunod na sangkap:

• 1 kilo ng baka (brisket o kalitiran)
• 5-8 tasa ng tubig pampalambot
• 1 buong bawang
• 1 pirasong sibuyas
• 1/2 tasa ng pulang asukal
• 4 pirasong star anise
• 1 tasa ng toyo
• 1 kutsarita ng tinadtad na luya
• 1 kutsarita ng pamintang durog
• Asin

Pakuluan hanggang lumambot ang baka kasabay ng bawang, sibuyas, asin at paminta. Karaniwang umaabot ang pagpapakulo ng 1-2 oras.

Pagkatapos kumulo ay ilagay ang toyo, star anise, at asukal.

Idagdag naman ang asin at paminta ayon sa iyong panlasa. Pakuluan muli ng 30 minuto.

Maaari nang ihain ang beef pares.