PatrolPH

Mga pisikal na aktibidad para sa 2022 Sinulog Festival kinansela

ABS-CBN News

Posted at Jan 06 2022 01:20 PM

Watch more on iWantTFC

Kinansela na ang mga pisikal na aktibidad para sa Sinulog Festival sa Cebu City, ayon kay Mayor Michael Rama.

Karaniwang idinadaos ang Pista ng Sto. Niño tuwing ikatlong linggo ng Enero.

Pero sa halip na mag-prusisyon at street dancing, magkakaroon na lang ng motorcade na mag-iikot ng imahen ng Sto. Niño sa mga pangunahing kalsada sa lungsod.

Ito'y sa harap ng muling pagsipa ng mga kaso ng COVID-19 sa Pilipinas, na sinasabing dahil sa mas nakahahawang omicron variant.

Ayon naman sa Basilica Minore del Sto. Niño de Cebu, puro online Mass na lang muna ang kanilang gagawin.

Pero papayagan naman anila ang mga deboto ng magtirik ng kandila at magdasal sa candle area ng simbahan.

Sa Biyernes na ang umpisa ng Novena Masses para sa pista.

Noong nakaraang taon din ay nakansela ang mga physical event ng Sinulog dahil sa patuloy na banta ng COVID-19.

Ayon sa datos ng city health department, nakapagtala ang Cebu City ng 22 bagong kaso ng COVID-19 noong Miyerkoles, dahilan para umabot sa 43 ang active cases. Noong Enero 1 ay 9 lang ang active cases sa lungsod.

Isinumite na rin ng lungsod sa Philippine Genome Center ang swab sample ng ilang balikbayan para makita kung sila'y may omicron variant.

— Ulat ni Annie Perez

Bisitahin ang Patrol.PH para sa iba pang mga balita.