'Kakayanin natin ito': Vilma Santos, nanawagan ng pagkakaisa

ABS-CBN News

Posted at Nov 13 2020 01:15 PM

MAYNILA -- Pagtutulungan ang mensaheng ipinaabot ng aktres at politikong si Vilma Santos, matapos manalanta ang bagyong Ulysses.

Sa Instagram nitong Huwebes, iginiit ni Santos na kailangan ang sama-samang tulungan para malagpasan ang pagsubok dala ng matindi at sunod-sunod na mga bagyo.

"Sama-sama tayong magtulungan upang malampasan natin ang patong-patong na unos na ating nararanasan. Kakayanin natin ito," ani Santos na gumamit din ng mga hashtag na #BangonLipa, #BangonBatangas at #BangonPilipinas.

Si Santos ang kasalukuyang kongresista sa ika-6 na distrito ng Batangas.
 
Nito lamang Linggo ay hinagupit ng bagyong Tonyo ang Batangas.
 
Halos dalawang linggo naman ang nakaraan ay napinsala ng bagyong Rolly at Quinta ang Batangas.

Nawasak ang tirahan ng libo-libong residente sa nasabing probinsiya matapos ang magkakasunod na bagyong Quinta at Rolly. 

Noong Quinta pa lang daw, nasa 1,000 bahay na umano ang nawasak, na nadagdagan pa matapos ang hambalos ni Rolly. 

Related video:

Watch more in iWantTFC

 

Bisitahin ang Patrol.PH para sa iba pang mga balita.