Karylle, ginawang Korean superstar si Ryan Bang sa 'Magpasikat'

ABS-CBN News

Posted at Oct 23 2019 03:10 PM | Updated as of Oct 23 2019 03:53 PM

Watch more on iWantTFC

MANILA -- Sa unang pagkakataon, nagsanib-puwersa sa pagtatanghal para sa "Magpasikat" sina Karylle at Ryan Bang.
 
Kasama ng dalawa sa kanilang pagtatanghal ang mga mang-aawit ng Tawag ng Tanghalan.

Nagsimula ang pagtatanghal sa pagpapakita ng mga pagkabigo ni Ryan sa kanyang mga napupusuan kabilang na rito sina Yeng Constantino, Kaye Abad at Alex Gonzaga.

Sinundan ito nang pagpapakita ng suporta ni Karylle kay Ryan sa pamamagitan ng isang awit. Gamit ang imahinasyon, pinasok nila ang isang wormhole kung saan nagkaroon ng "Showtime Korea" sa taong 2029. Dito nagpakitang gilas ang TNT singers. 
 
Kasunod nito ang paglabas ni Ryan bilang isang Korean superstar kung saan ibinigay niya ang lahat sa kanyang paghataw. 

Napukaw naman ni Ryan ang mga manonood nang ikuwento niya ang kanyang buhay simula noong siya ay mag-aral sa Pilipinas sa pamamagitan ng isang Tagalog rap na siya mismo ang nagsulat.

Pagbangon sa mga pagsubok at ang hindi pagsuko sa pagkamit sa pangarap ang mensaheng ibinahagi ng pagtatanghal nina Ryan at Karylle.

"Hindi madali bilang Koreano na mag-isa lang akong pumunta rito 14 anyos. Ang magulang ko nasa Korea. Sa buhay, ang importante ay hindi lang dahil sa iyo kung hindi 'yung mga nakapaligid sa iyo. Ako, naging mabuting tao ako dahil sa mga taong nakapaligid sa akin ay mabuti. Sana po pili kayo ng mabuting tao para maging mabuti ka rin," ani Ryan matapos ang kanilang pagtatanghal.

Naging emosyonal naman si Karylle sa pagbibigay niya ng mensahe kay Ryan na binigyan niya ng pagkakataon na magningning sa "Magpasikat 2019." 

"Every day kong sinasabi sa kanya na you are my favorite, you are my byeol kasi alam ko one day iiwan niya tayo magiging superstar siya sa Korea and parang ito 'yung ginawa natin and I see it so much Ryan. Thank you for spending so much time in 'Showtime.' One day you will have to fly pero huwag mo kaming kakalimutan. Love your ate," ani Karylle.